Ég hef ekki bloggað hátt í sex mánuði ... og samt eru komin 98 innlit á síðuna í dag. Er teljarinn minn bilaður .... ?

Jæja, þá er Jólastrympa komin heim í heiðardalinn eftir dásamlega vel heppnaða maraþonferð til útlandsins Eftir töluverð (vægt til orða tekið!   ) hlaup undanfarnar vikur (og tjah, bara nokkuð þétt hlaupasumar) var loksins komið að maraþoninu á sunnudaginn......

.... byrjum á byrjuninni.

Fríður hópur íslenskra hlaupara í Afrekshóp nokkrum hittust reifir og glaðir í Leifsstöð á föstudagsmorgun með eitt og einungis eitt markmið í farteskinu - að hlaupa et stykke maraþon í úttlandinu! Flestir spiluðu sig frekar svala fyrir maraþonátökin og þóttust lítið stressaðir, enda átti þessi hópur það inni, verandi búin að hlaupa eins og stjörnuvitlaust fólk um stræti borgarinnar og stíga Heiðmerkur svo vikum skiptir. Kílómetratölur eins og hundrað plús sáust nokkrum sinnum á hinni margrómuðu hlaupadagbók

Eftir þægilega flugferð, skoðunarferð um borgina og hótelinntjékk var haldið í maraþonhöllina í þeim tilgangi að sækja hlaupagögn og númer. Ég lét það vera að versla mér hlaupavarning á uppsprengdu evruverði og sá hag minn vænstan í því að spara öll innkaup þar til Emoríka verður heimsótt innan skamms tíma .... þar verður spreðað í hlaupastöff enda dollarinn heldur skárri en evran ..... Nú, eftir kvöldmat og spjall var haldið í rekkju. Ég var ansi tuskuleg og tætt eftir lítinn svefn og langan dag og taldi heppilegast að skella mér í draumalandið, enda er ég ekki upp á marga fiska þegar ég er ósofin ..... ....

Laugardagurinn fór í að passa upp á að ganga ekki of mikið því maður vildi jú hafa lappargarmana óþreytta daginn eftir Við veðurfréttakonan tókum léttan verslunarrúnt í bænum ..... það er víst ennþá hægt að versla í hinni margrómuðu hennesogmáridds-búð þó að það kosti mann handleginn að  versla eina evru! Restin að deginum fór í tjill, notalegan kvöldverð með félögunum og skipulagningu á sjálfum maraþondeginum ...... maður þarf jú að ákveða klæðnað, setja tímaflöguna á skóinn, gera drykkjarbeltið klárt, taka til gelin, stilla ípóðann, næla númerið í treyjuna og tjúna sig inn á hlaupið

Eftir mjög góðan svefn vaknaði ég á maraþondaginn ...... nákvæmlega ekkert stressuð! Það er nú frekar ólíkt mér þegar stærri hlaup eru annars vegar því ég á það til að vera með hnút í maganum .... svona keppnishnút eins og ég fékk fyrir leiki í körfunni í den ....... þessi hnútur er nú alveg ágætur til síns brúks, þ.e. þegar hann er ekki of stór. Ef hann er hæfilegur, þá er hann bara til góða ..... En það var víst enginn hnútur þennan maraþondaginn því ég var alveg helslök á kantinum Fékk mér grautinn minn og eina brauðsneið, drakk vel af vatni og fór að svo búnu upp á herbergi til að dressa mig upp. Bleikur var aðallitur dagsins - bleikur bolur og bleikt svitaband.... og bleikur æpod  ... Veðurfréttakonan var ekki hógværari en ég í bleiku deildinni og var í dökkskærblækum topp og skærbleikum hnésokkum! Toppið það Við vorum tignarlegar, það er ekki hægt að segja annað

Þó að hótelið hafið verið í fimm mínútna göngufjarlægð frá maraþonhöllinni og ráslínu ákváðum við að vera snemma í því ... tíminn líður jú alltaf hraðar en maður gerir sér grein fyrir í svona aðstæðum. Eftir að hafa gengið frá fatapokum og ég hafði sagt skilið við félagana fór ég í mitt hólf við ráslínu.... og ennþá var ég mjög spök og fann bara til tilhlökkunar. Ég hafði þa líka á bak við eyrað það var fullt af fólki að fylgjast með mér heima sem var á fullu að senda mér kraftmikla og íslenska orkustrauma  .... og svo ætlaði mamam gamla að kveikja á kerti fyrir mig nákvæmlega klukkan 10 þegar hlaupið hófst .... það er rótgróin hefð hjá mútter og mér finnst hún ansi notaleg
Maraþonið sjálft gekk mjög vel. Ég fann aldrei fyrir neinu stressi á neinum einasta tímapunkti í hlaupinu, leið bara vel frá byrjun. Ég var ansi spræk í upphafi hlaups og byrjaði á fínu tempói. Fílaði mig í tætlur í bleikum bol merktum Íslandi og nafni, en ekki hvað?!!?  Veðrið var flott - það var reyndar aðeins of heitt fyrir minn smekk því sólin mætti tímanlega rétt áður en hlaupið var ræst! .... en, smá andvari á köflum reddaði mér alveg sem og skuggar af trjám og húsum. Brautin var svo gott sem flöt og áhorfendur alla leið sem voru duglegir að hvetja mann áfram. Gel-og vatnsinntaka gekk snuðrulaust fyrir sig og engin magaónot gerðu vart við sig!
Eftir um það bil 28 kílómetra fóru lappirnar að striðna upp. Ég var nú bara nokkuð ánægð með að hafa geta hlaupið svo langt án vandkvæða þar sem ég er búin að vera með eitthvað fótavesen síðastliðnar þrjár vikur! Þannig að hlutirnir voru greinilega að smella líka svona skemmtilega á rétta deginu .... Þegar ég hafði landað 30 kílómetrum fór þetta að verða barningur við sjálfa mig og lappirnar .... var eðlilega orðin þreytt og ansi sveitt .... en vildi ekki hægja á mér ..... ekki bætti úr skák að það var haugur af fólki farið að labba ... og ég skal sko segja ykkur það að það var illa freistandi að slást bara í lið með gönguliðinu og trítla rólega í mark ... það var hins vegar ekki í boði. Hver kílómetri var því tekinn í einu og þess á milli mantraði ég: halda áfram halda áfram ekki labba ekki labba ....... sem að lokum skilaði stelpunni í mark á 3:58:12

... þannig fór um sjóferð þá. Annað maraþonið í höfn ... og svei mér þá ef maður er ekki farin að pæla í hvar maður eigi að spreyta sig næst!

Jæja, þetta er komið gott. Sigrún Jana, vona að þetta svali maraþonbloggfærslufýsni þinni í bili

Jóla

Þonískur tjékklisti Jólu:

• Búin að hlaupa og æfa nóg - tjékk
• Búin að sofa nóg - tjééékk
• Búin að borða heilsusamlegt fæði - jebb, tjékk
• Búin að negla hraðatöflu - tjékk
• Búin að pæla mikið í hlaupinu sjálfu - ekki alveg nógu mikið tjékk
• Búin að gera sér grein fyrir því að hlaupið er eftir viku - ekki tjékk

.....þjiiiitttt .... nú verð ég að taka mig saman í andlitinu - er engan veginn að gera mér grein fyrir því eða koma því inn í kollinn á mér að ég sé að fara að leggja 42,195 hlaupna kílómetra að velli næstkomandi sunnudag

Átti annars frábæra helgi! ... mjög svona helgarlega helgi ef svo má að orði komast ..... það var reyndar ekki pabbapizza á föstudaginn heldur bara Jólu-pizza sem var reyndar frekar mikið djúsí og góð .... nú ... svo var hlaupið (að sjássögðu   ) ... sjillað .... prjónað .... farið í búðir ..... svo tók maður eina bíóferð ..... fór einn myndarúnt með myndavélina .... horfði á imbann ..... og tók einn nettan laugardagslúr, það er best

Jæja, best að fara í háttinn - þarf að gera svoooooooooooooooooooooooooooooona mikið á morgun

Júlsen

Heil og sæl

Dagurinn í dag markar upphafið að því að jólin eru farin að segja til sín í okkar dásamlega samfélagi hér á kreppuklakanum ..... Ég vaknaði í morgun ..... og sá heilsíðuauglýsingu þess efnis að jóladýrðin væri mætt á svæðið í I*K*E*A .... gott mál .... eitt stig þar ...... Því næst var umræða um það, í morgunþætti Bylgjunnar, hvenær leyfilegt væri að hlusta á jólalög og hvenær búðir mættu almennt fara að selja jólaskraut ..... annað stig fyrir góða jólaumræðu ..... Nú, svo í kvöld, þurfti ég nauðsynlega að skjótast inn í Húþaþmiðju að kaupa postulín utan um öryggi í hundrað ára gömlu rafmagnstöfluna mína ...... greip reyndar í tómt hvað postulínið varðar ... en fékk í staðinn að sjá starfsmenn Húþaþmiðjunnar og Blómavals á þönum eins og álfa jólasveinsins að setja upp jólapuntið í hillurnar og smíða og setja upp jólasveinalandið ..... Heil þrjú stig fyrir það sko!! .... Og til að toppa þetta allt saman voru jólaljós á trjánum fyrir utan Húþaþmiðjuna fyrir ALLAN peninginn ... svona .... þið vitið .....silljón jólaljós .... eitt auka jólískt stig þar! ..... þannig að í heildina ber þessi dagur sex jólastig úr bítum sem er askolli gott .... enda BARA 70 dagar í jólin

Annars eru hlaup heldur snautleg þessa dagana. Annars vegar vegna þess að það er bara almennt niðurtrapp í gangi æfingalega séð því þonið er eftir 10 daga og hins vegar vegna þess að lappirnar eru í verkfalli. Þær vilja ekki hlaupa meira. Þannig að ég hef verið að tvista svolítið með sundæfingar í stað hlaupa ... bara svona til að hlusta á kroppinn og gefa leggjunum smá frí

Jæja, best að veita nýja fréttatíma skjáseins athygli.

Indtil videre,
Julsen

Sjitt hvað ég var skynsöm í morgun .... sko ... sjitt

Ég tók sjálfa mig á eintal í gærkvöld þar sem umræðurnar snerust um hvort ég ætti að láta eins dags hvíld nægja og þar með hlaupa í morgun eða vera skynsamasta strympa þessa heims og taka tveggja daga hvíld og hlaupa á morgun. Það er nefninlega stundum þannig, þegar maður er komin í mikla æfingahringiðu og finnst ekkert eðlilegra en að skottast út og hlaupa 10-15 km eftir vinnu, þá getur verið erfitt að hafa hemil á sér og fara ekki út ... þá líður manni eins og maður sé að svíkja sjálfan sig og maraþonmálstaðinn ... fer jafnvel að gera sér upp grillur um það að ef maður fari ekki út þá muni maður tapa  markmiðum sínum í maraþoninu ..... þið vitið ... að maður nái ekki settum tíma ... nái ekki að klára eða eitthvað í þeim skemmtilega dúr
Eftir að hafa skeggrætt við sjálfa mig og velt fyrir mér ástandi lappagarmana ákvað ég að sofa út í morgun og taka langt á morgun ....

....emm, talandi um að sofa út. Ég svaf nú ekki sérlega myndarlega út ... var glaðvöknuð klukkan 8:50 og gat ekki fyrir mitt litla strympulíf sofnað aftur .... Reif mig á lappir, borðaði grautinn minn, las blöðin, hlustaði á Sim & Joe og tók svo í prjónana mína .... alveg hreint ægilega kósí Til að uppfylla hreyfiþörf dagsins voru svo teknir nettir 1500 í Vesturbæjarlauginni og mikið var það nú sérdeilis indælt Ég er ágætis sundstrympa þegar ég tek mig til og lufsast með sjálfri mér út í laug

Jæja, prjóniprjón og tjillitjill.

Jóla sundstrúmpa

Uss, þessi framkoma mín hér á blogginu er ekki aðdáendum bjóðandi! Að blogga strjált er slæleg frammistaða og hér skal úr því bætt!

Það hlaut að koma að því að kroppurinn segði hingað og ekki lengra Jóla!!!!!!!! Ég vil ekki hlaupa meira, leimmér að tjilla þmá ... bara ogguponþ ....... 

... já, ég heyrði veikluleg óp frá mínum ágæta skrokki eftir 20 km hlaup með veðurfréttakonunni á miðvikudaginn. Á meðan ég bisaði við það að koma mér heim úr vesturbæjarlauginni, skökk og skæld, stíf og þreytt og skakklappaðist sem leið lá upp tröppurnar (undirrituð tekur sér það bessaleyfi að nota höfundarrétt sinn til að ýkja endrum og sinnum) emjaði litli (*hóst*) strympukroppurinn minn .....  Hann óskaði í eymd sinni eftir því að ég skyldi draga aðeins úr hlaupum, þetta væri honum ekki bjóðandi! Hann tilkynnti mér að hann væri verulega þvældur og tættur og gæti hreinlega ekki borið mig áfram undir svo miklu hlaupaálagi. Ég hlustaði á ámátlegt kveink hans og var nokkuð sammála. Ég var nokkuð þreytt. Skrokkurinn hætti þó ekki að dæla skilaboðunum til undirritaðrar og gerði það fram eftir degi og fram undir kvöld, allt þar til Jóla fór að sofa.
Ég ákvað því að láta undan í gær og hljóp styttra en lög gerðu ráð fyrir á fimmtudögum. Það var ágætt enda var ég ekki upp á marga fiska - skrölti eins og gamall bensínskrjóður um götur þessarar borgar með englapiss og Kára í farteskinu.

Á morgun verða 15 - 20 kílómetrar lagðir að velli í stað 25 og svo taka tvær vikur þar sem dregið verður verulega úr æfingaálagi þar sem þonið mikla er barasta að renna upp

Nú, svo tel ég það jólíska skyldu mína að tilkynna eftirfarandi:

• Jólaöl í dósum er nú tilbúið til kaupa í matvöruverslunum hér í borg, tja alla vega einni sem ég þekki mjög vel

• Piparkökur prýða hillur matvöruverslana hér og þar .... að minnsta kosti í einni sem ég þykist þekka nokkuð vel

.....og

svo er það ein strympísk skylda að lokum:

• Strumparnir, átrúnaðargoð mín síðan snemma á níunda áratug síðustu aldar, eru komnir út á DVD .... ég segi það og skrifa með sól í hjarta og bros á vör

Lifið heil.

Jóla

Ég var að keyra í núna í vikunni ... um götur bæjarins ... sem er hvorki nýtt né í frásögur færandi því við Lúlli þeysumst fram og til baka um borgina alla daga ... nema hvað að hugurinn reikaði að komandi jólum ..... og þeirri staðreynd að það er bara skolli stutt í aðventuna .... jólapúkinn kom upp í mér og mantraði á vinstri öxlinni að ég mætti nú alveg leyfa mér að setja eins og einn jólageisladisk í til að fá jólafiðringinn á stórkostlegt skrið....... ég hef ennþá vinninginn ..... er ekki búin að leyfa mér að blasta eina jólanótu ... en það fer nú alveg að koma að þeim tímapunkti að ég verði góð við sjálfa mig og hlusti á eins og nokkra jólatóna með Ellý & Villa Vill

Er annars ansi nett á kantinum Er dulítið stirð eftir erfitt Heiðmerkurhlaup i gær þrátt fyrir sjóðandi heitt bað í morgun og góða teygjustund. Lang lang erfiðasta vikan að baki og nú fer kílómetrum fækkandi með hverri vikunni. Næsta vika verður erfið, en þó ekki jafn erfið og vikan sem er að renna sitt skeið .... síðan er það ein nokkuð létt vika og svo bara vikan fyrir maraþon sem er svo gott sem hvíld .... Eftir nákvæmlega þrjár vikur ætti Jóla að vera komin í mark í þoninu á UNDIR fjórum klukkustundum takk Það er markmið þessa þons.

Ætli ég fari nú ekki í húsmóðurgírinn og smelli í eins og eina góða köku fyrir kveldið - súkkulaðiklúbbshittingur á dagskránni.

Lifið heil.

Jóla, Hannes á himnum, Lúlli, Sammi Geymslufákur og vistkerfið sem er í rénun

Mig minnir að ég hafi bloggað um vistkerfi í fyrra. Ég ætla að rifja upp það blogg.

Ef mig misminnir ekki var ég  að velta fyrir því af hverju fullorðið fólk eins og ég (já, ég myndi flokka mig sem fullvaxta einstakling, nánast 27 ára) fær bólur! Maður fyrirgaf það fyrir svona 10 árum því það bara fylgir því að breytast úr barni í fullorðinn einstakling að fá nokkrar bólur ...  ... iss, það var nú ekkert til að kippa sér upp við .... en núna, nú er slíkur gjörningur líkamans bara ekki gúdderaður.
Og af hverju er Jóla að rifja þessar vangaveltur sínar upp hér og nú? ... jú, því að hún er með nýtt vistkerfi á hökunni. Þetta er ekki bóla ... og ekki Esjan ... hvað þá Mánt Everest ... nei, þetta er nýtt vistkerfi
Mér er ekkert um þetta vistkerfi. Helst mætti það detta ofan í svarthol og koma aldrei aftur. En, það er hérna og núna, á mér og minni höku og því verður ekki breytt.

Ég fór einmitt, ásamt óvelkomna vistkerfinu, að hlaupa í Heiðmörk í morgun. Hvílík dýrðardásemd sem það nú var (mínus tilvist vistkerfisins). Heiðmörkin var á hátindi haustlitafasans ... veðrið var guðdómlegt ... logn ... heiðskírt með tilheyrandi sól ... og, ekki svo ýkja kalt Ég var nú sérdeilis lukkuleg með það.
Hlaupið gekk nokkuð vel. Tókum þrjá 12 km hringi og gengu fyrstu tveir hringirnir vel fyrir sig enda dróg veðurfréttakonan mig áfram. Síðasti hringurinn var þokkalegt ströggl enda var undirrituð ansi lúin eftir þétta hlaupaviku sem telur nú 109 km. Slíkan fjölda kílómetra hef ég aldrei hlaupið á einni viku ....

.... enda er ég lúin núna ... .svo lúin, að ég og vistkerfið ætlum að fá okkur síðdegisblund

Jóla, Lúlli, Hannes á himnum, Sammi í geymslunni og ........................ vistkerfið

[Jóla stendur í hlaupagallanum og klæðir sig í hlaupaskóna inni í forstofu]

Pabbi Jólu: Ertu að fara að hlaupa?

Jóla: Emm, já

Pabbi Jólu: Jaaá, og hvað á að fara langt, 20 km?

Jóla: Ni, bara svona 7 - 10 km, á að vera spök í dag

Pabbi Jólu: Núúú, bara smá spotti  .....

Heil og sæl

Vekjarinn hringdi klukkan 6:50 í morgun .... ég var þokkalega syfjuð og með kínaaugnasyndrom á háu stigi ..... mikið magn hlaupinna kílómetra í þessari viku sem og ónógur svefn í hlutfalli við allan þennan hlaupadjöflagang olli því að ég var þreytt  ..... ekki bætti það á löngun mína að fara úr bælinu, til þess að taka langt laugardagshlaup í Heiðmörk, þegar ég leit út um gluggann .....rok í tíunda veldi og ekki sérlega hlýtt .... um það bil heilar fimm gráður ... ... haustið er sem sagt mætt á svæðið ...

Nú, það þýðir ekki að sitja heima og tjilla þegar maður er á leiðini í þon ... og því hristi ég upp í sjálfri mér .... kom mér í stemningu ... eða þið vitið, eins mikla stemningu og hægt er að koma sér í á ókristilegum laugardagsmorguntíma .. Fékk mér hlaupamorgunmatinn minn ... las um heimsins gagn og nauðsynjar í dagblöðunum, lúrði og kúrði í um það bil hálftíma og hypjaði mig svo af stað ..... Ég taldi ráðlegra að klæðast vetrarhlaupabuxunum miðað við fjölda metra á sekúndu og hitastig ......

... keyrði svo á honum Lúlla mínum upp í Heiðmörk ..... þar sem ég mætti vöskum hlaupafélögum mínum..... Ég hugasði með hlýju til vetrarbuxnanna sem ég var klædd í enda var ekkert sérlega hlýtt í sveitinni ......
Á dagskránni voru hvorki fleiri né færri en 35 kílómetrar ... Ef ég á að vera hreinskilin þá var ég ekki mjög upplögð þegar við lögðum af stað.... með þungar lappir og hálflasið hné sem ég var smeyk um ..... ekki bættu allar brekkurnar úr þessu hlaupaóstuði mínu .... ég var lafmóð ... svo móð að ég gat nánast ekki haldið uppi samræðum við hlaupafélagana .... En, þessi kroppur sem við eigum er svo skrýtinn .... því eftir um það bil átta kílómetra var eins og hendi væri veifað og ég var eins og nýsleginn túskildingur! ..... og þrátt fyrir rok og haglél og slyddu og ekki sérlega hlýtt loft kláraði ég tilskilda 35 km með ágætis bros á vör .... og ennþá stærra bros á vör yfir því að hnéið kvartaði ekki neitt 

Lífið er gott

Fjórar vikur í þon!

Jóla hlaupari

Jæja

• 4 vikur og 1 dagur í ammó
• 4 vikur og 4 dagar í maraþon
• 92 dagar í jólin

Stundum er gott að vera fullorðinn - tíminn liður nefninlega stjarnfræðilega hratt á gervihnattaöld þegar maður er svona fullorðins strúmpa

Júlsen, Hannes á himnum, Lúlli og Sammi

Jæjah.
Dagurinn í gær var aldeilis góður
Byrjaði á hafragraut með epla-og kanilívafi og blaðalestri. Eftir smá lúr var svo farið í hlaupagallann og haldið í Laugar þar sem veðurfréttakonan og Íslandsbankakonan biðu spenntar eftir hlaupaáskorun dagsins. Ég bjóst bara við þægilegu 30 km hlaupi sem við myndum tækla á um það bil þremur klukkustundum ..... en það var nú sérdeilis ekki raunin. Veðurfréttakonan er enn uppveðruð eftir Laugavegsupplifun sína og vildi endilega komast í snert við náttúruna .... og teymdi okkur Íslandsbankakonuna út fyrir malbikið Ég er reyndar hlynnt svona utanvegatjútti, finnst það nánast skemmtilegra en malbiksplampið Til að gera langa sögu stutta var hlaupið frá Laugum upp að Hafravatni í gegnum Grafarvog og Grafarholt, fram hjá Úlfarsfelli og til baka í Laugar ... með stuttum stansi í Nóatúni í Grafarholti þar sem undirrituð var þrisvar sinnum búin að deyja úr þorsta á leiðinni og sá sig því knúna til að fjárfesta í hinum dýrmæta mjeði er kallast vatn. Hér dugði eigi minna en heill lítri af vatni til að fylla á tankinn Alveg hreint stórmagnað hvað ég get svolgrað mikið af vökva á svona löngum hlaupum.
Hlaupísk niðurstaða dagsins voru 32,5 km á 3 klukkustundum og 19 mínútum um holt og hæðir og ansi margar dauðabrekkur... skolli gott dagsverk og þó var bara komið hádegi!

Var að horfa á kvöldfréttir áðan .... og sá svipmyndir frá Berlínarmaraþoninu .... úffpúfffjúff ..... það leit úr fyrir að hafa verið ansi heitt á hlauparana ... ég býð nú ekki í svoleiðis sólarbombu í mínu maraþoni í október ... nógu verð ég þyrst í löngum laugardagshlaupum í 8 stiga hita og golu hér á Íslandi .... veit ekki alveg hvernig ég tækla vatnsinntöku þegar hitinn er kannski .. tjah, 20 gráður ... spörning um að koma sér upp sjálfvirku innvortis vökvunarkerfi .... svona svo maður skrælni ekki á sjöunda kílómetra!

Jæja, frásagnarbrunnur uppurinn.

Jóla, Hannes á himnum, Lúllz and Sammz

Þjitturinn Þetta er um það bil letilegasti sunnudagur (og tjah, bara dagur!!) sem ég hef upplifað lengi ..... vakna klukkan 11 ... borða ... lesa .. tölvan .... lesa .. borða ... sofna ... og vakna síðdegis .....

Púff, farin í bað, þessi haugagangur gengur ekki lengur

Peningar eru ekki allt! ... þetta segir háttvirtur seðlóstjóri í dag .... iss, ég skal sko sýna honum í tvo heimana og leyfa honum að kynnast neysluhegðun minni síðastliðinna daga sem og peningatrénu mínu! Þá sér hann að peningar eru alla vega eitthvað sem og mikilvægi þess að geta keypt hlaupaskó og matreiðslubækur eins og enginn sé morgundagurinn sem er grundvallað á þessu ágæta tréi

... Annars er föstudagur í dag. Hefðbundinn föstudagur. Vinna til fjögur .. heim að sjilla .... glugga í hlaupablað .... lúra aðeins ... borða pabbapizzu .... og tjilla. Tjillið er mjög mikilvægt því það er svo gott að undirbúa sig andlega og líkamlega fyrir langa hlaup vikunnar sem á sér stað í fyrramálið. Ég er búin að mæla mér mót við veðurfréttakonuna og Íslandsbankakonuna við Laugar. Veðurfréttakonan mun sjá um að ákveða hlaupaleiðina í fyrramálið sem telur 30 kílómetra. Það er mikilvægt og um leið vandasamt hlutverk. Jú, sjáið til, það er nefninlega svo ótrúlega gaman að hlaupa nýja leið, það getur stytt hlaupið (andlega séð) mjög mjög mikið. Þá er fær maður nýja nálgun á margfarnar slóðir.... sem leiðir til þess að tíma-og vegalengdaskynið brenglast aðeins ... sem leiðir svo til þess að maður veit ekki hvað tíma eða kílómetrum líður! Þokkalega mikill kostur  .... Það getur verið dálítið leiðigjarnt að hlaupa alltaf sama 25 km hringinn ... eða sama 30 km hringinn .... sem maður getur jú fest sig í því það er svo þægilegt að fara bara 30 km hringinn sem maður fór síðast því þá veit maður að hann er akkúrat 30 ......mjög letilega hugsað ... en maður stendur sig oftar en ekki að verki með þennan þankagang   .... en já ... sem sagt .... þörtí keis túmorró morning í eðal félagsskap

Einu sinni bloggaði ég bara um djamm, jól, pepsímax, flödeboller, júróvisjón og að ég nennti ekki að fara að læra ..... núorðið blogga ég alls ekkert um djamm, þó nokkuð minna um jól, nákvæmlega ekkert um mepsi pax, grunsamlega lítið um flödeboller.... tímabundið um júróvisjón (ca á tímabilinu janúar - maí ár hvert   ) og nákvæmlega ekkert um að ég nenni ekki að fara að læra .... ÞVÍ AÐ ÉG ER BÚIN MEÐ SKÓLANN .... nú eru það hlaupin, prjónaskapur ... og annar vitleysisgangur sem vellur upp úr mér .... og jú, ætli jólahugleiðingar fari nú ekki að detta inn enda fer október að banka upp á fyrr en seinna ... og þá er nú sérdeilis stutt í jólin

Jæja, pabbapizza er reddí, best að gæða sér á dásemdinni.

Lifið heil.

Jóla seðlableðla

ÁÁÁÁÁÁÁÁÁFRAM ÍSLAND, SÝNIÐ HVAÐ ÞIÐ GETIÐ MEÐ BOLTANN Í NETIÐ.... .... þennan frasa notaði maður óspart í körfunni í den ... nema þá var það KR í staðinn fyrir Ísland .... maður gargaði úr sér lungun ...... ... allt fyrir að skora sko ... allt fyrir stigin!
Var sem sagt að koma af ðí landsleikur þar sem stelpurnar okkar tóku eitt þokkalega nett rústpunkturis á erlenda gesti sem ég fann dálítið til með .... úff .... þrjú núll og varla liðnar nema sirka 8 mínútur af leiknum ..... .... það er slæmt fyrir sálartetrið ..... En, ef ég tek vorkunnsemi mína gagnvart mótherjunum í burtu úr þessari jöfnu þá var þetta bara hinn skemmtilegast leikur. Og mér sem fannst leiðinlegast út í geim og aftur heim að horfa á fótbolta fyrir nokkrum árum .... Tæklaði Noregsleikinn fyrir 12 dögum og var svo í stúkunni áðan .... við pabbi erum greinilega alveg sveigjanleg hvað þessi mál varðar (samanber færsluna hér á undan   )

Já já, annars ganga hlaup bara vel fyrir sig. Aftanverður lærisvöðvi, sem ég átti í basli með um daginn, hefur verið nokkuð skaplegur eftir að sjúkri nuddaði mig í tætlur og vel fyrir ofan sársaukamörk auk þess sem hann potaði nokkrum nálum í mig hér og þar .... Það virkaði því ég er orðin bara ágæt. Get tekið löng hlaup og sprettæfingar án teljandi vandræða. Það er mjög ánægjulegt ... krosslegg fingur um að þetta maraþonhlaupaplan sem og maraþonið sjálft gangi upp ... það er nebblega ekkert svo svaaakalega mikið eftir ... þessi vika auk næstu þriggja eru þyngstu æfingavikurnar sem telja sirka 80 km á viku ... eftir það tekur niðurtrapp við. Tíminn flýgur .... *krosslegg fingur*

Annars haga ég mér dálítið 2007 þessa dagana ...... Keypti mér forláta kökubók af A*m*a*z*o*n fyrir tveimur vikum .... gekk svo inn í Mál og menningu í fyrrakvöld og keypti mér nýju brauðabókina sem var að koma út sem og nýjasta tölublaðið af R*u*n*n*e*r*s W*o*r*l*d ..... smellti mér svo aftur inn á A*m*a*z*o*n í dag og fjárfesti í hlaupabiblíu sem mér var góðfúslega bent á að væri ægilega sniðugt að eiga .... og brunaði svo eftir vinnu í dag og keypti mér nýja hlaupaskó ..... og mun svo fjárfesta í öðrum í næstu viku því það er jú nauðsynlega skynsamlegt að eiga tvö pör af hlaupaskóm ........ Ég er að segja ykkur það, peningatrésfræin sem ég keypti í Gardenworld svínvirka alveg ... peningatréið sprettur eins og enginn sé morgundagurinn *hóst* ... ég bara ræð ekkert við alla þessa bleðla og seðla .....

Jæja, hætt þessu bulli.

Óli Lokbrá var að láta vita af sér

Jóla, Hannes á himnum, Lúlli og Sammi